Instituto do Petróleo e Geologia – Instituto Público (IPG) Timor-Leste hanesan institutu publiku ida ne’ebe forma husi Dekretu Lei RDTL no. 33 tinan 2012. IPG hanesan institutu ida ne’ebe mak ho misaun prinsipal hanesan arkivu, produsaun, jestaun, armazenamentu no fahe informasaun jeolojika inklui mos kona ba rekursu naturais hanesan mina rai, gas no mineral ne’ebe sai hanesan baze ba servisu prospeksaun, peskija no eskplorasaun rekursu minerais nasionais nian.

Bazeia ba misaun IPG nian ne’e mak iha dia 19 de Setembru de 2016 to’o dia 03 de Outubru de 2016 Ekipa Trabalho do Projeitu husi IPG halao ona Servisu Mapamentu Jeolojia no Prospeksaun Mineral iha Area Citrana, Oé-Cusse, Timor-Leste. Servisu kampu ida ne’e nudar servisu kontinuasaun husi servisu dahuluk nebe’e halo iha tinan 2014 iha area Pasabe ho Nipane, Oé-Cusse, Timor-Leste.

Ekipa Trabalho do Projeitu sai hanesa ekipa ida ne’ebe hetan responsabilidade atu hala’o estudu jeolojia no prospeksaun mineral iha area Citrana, Oé-Cusse, Timor-Leste atu bele hatene kondisaun jeolojia iha area refere no indikasaun; distribuisaun; kuantidade no kualidade rekursu mineral nebe’e eziste iha area refere atu suporta ba kriasaun mapa jeolojia no mapa baze potensia rekursu mineral iha area Citrana, Oé-Cusse, Timor-Leste.

Ekipa Trabalho do Projeitu kompostu husi Victor Aleluia V. de Sousa, Antonio de Jesus Araujo, Job Brites dos Santos, Moises Soares, Felix Januario G. Jones, Frederico Carlos Maria dos Santos, Joao Pratas, Joao da Ressureicao Canito no Aleixo Tavares.

Dadus ne’ebe ekipa kolekta iha kampu mak dadus observasaun ba afloramentu ne’ebe hetan, kolekta amostra fatuk hodi analija petrografia ho geokimika no foti amostra rai henek iha mota hodi halo analija grau mineral no analija geokimika hodi hatene los presentajem elementu kimika husi mineral todan sira ne’ebe mak konteudu iha amostra raihenek.

Iha tempu badak ekipa sei fo sai rejultadu peskija nian hanesan mapa jeolojia area Citrana, rejultadu husi analija graun mineral no analija geokimika. Husi rejultadu ne’e mak nudar determinasaun ba peskija ne’ebe detalyu liu tan.